نگراں وزیرِ اعلیٰ پنجاب محسن نقوی کی رائے ونڈ تبلیغی اجتماع آمد

نگراں وزیرِ اعلیٰ پنجاب محسن نقوی نے رائے ونڈ تبلیغی اجتماع کا دورہ کیا ہے جہاں انہوں نے علماء اور اکابرین سے ملاقات کی۔

اس موقع پر وزیرِ اعلیٰ پنجاب محسن نقوی نے اجتماع کے انتظامات اور سہولتوں کا جائزہ بھی لیا۔

انہوں نے سی سی پی او، کمشنر اور ڈی جی ایل ڈی اے کو انتظامات کے حوالے سے ضروری ہدایات دیں۔

میڈیا سے گفتگو کرتے ہوئے وزیرِ اعلیٰ پنجاب محسن نقوی کا کہنا ہے کہ اجتماع کی مؤثر مانیٹرنگ کے لیے کیمرے لگائے گئے ہیں، اضافی پیٹرولنگ پولیس بھی تعینات ہے۔

انہوں نے کہا کہ تبلیغی جماعت دینِ اسلام کی تبلیغ کے لیے گراں قدر خدمات انجام دے رہی ہے، اللّٰہ تعالیٰ کے دین کو پھیلانے والے دین اور دنیا دونوں کما رہے ہیں۔

نگراں وزیرِ اعلیٰ پنجاب کے دورے کے دوران مولانا احمد لاٹ نے عالمِ اسلام کے اتحاد، دین اسلام کی سر بلندی اور امن و استحکام کے لیے دعا کرائی۔

وزیرِ اعلیٰ پنجاب محسن نقوی سے ملاقات کے دوران عالمی تبلیغی اجتماع کے اکابرین نے انہیں بتایا کہ اجتماع میں 5 لاکھ افراد کی شرکت متوقع ہے۔