چیچہ وطنی میں عظمت قرآن کانفرنس و سالانہ برسی حاجی محمد یعقوب سلطانی مرحوم کا انعقاد ہوا

چیچہ وطنی(باہو ٹی وی)جگر گوشہء سلطان العارفین وزیب سجادہ حضرت سخی سلطان باھوؒ پیر سلطان فیاض الحسن سروری قادری نے کہا ہے کہ امت ِ مسلمہ کیلئے عصر حاضر کڑے امتحان کا وقت ہے ہمارے پاس ان ناگہانی مشکلات ومصائب سے نجات کیلئے واحد راستہ یہ ہے کہ رب العزت کی بارگاہ میں اپنے گناہوں کی اجتماعی توبہ واستغفار کرنے کے بعد ”قرآن مجید فرقان حمید“کا دامن تھام کراپنی زندگیوں کو روشن و مقدس تعلیمات سے آراستہ کرلیں،

انہوں نے جڑانوالہ کے علاقہ میں گذشتہ روز توہین رسالت، قرآن مجید کی بیحرمتی اور اس کے ردعمل میں عیسائی اقلیت کے خلاف پرتشدد ہنگاموں کو افسوسناک قرار دیتے ہوئے کہا کہ ایسے مواقع پر دینی تعلیمات کی پس منظر میں سلجھے ہوئے مناسب طریقے سے اپنا ردعمل ظاہر کریں، ہمارے نبی اکرم ﷺ نے حالت جنگ میں بھی غیر مسلموں کی عبادت گاہوں کو نقصان پہنچانے سے منع کیا ہے،

لیکن چند ناسمجھ عناصر کی وجہ سے ہمیں شرمندہ ہونا پڑا ہے حالانکہ شرمندہ تو انہیں ہونا چاہیے تھا، یہ ہنگامہ آرائی کس دین کی نسبت سے کی جاتی ہے ہمیں 9مئی جیسے واقعات سے سبق سیکھنا چاہیے اس سے غرض نہیں ہے کیوں ہوا؟یا کیسے ہوا؟ لیکن جو بھی ہوا صریحاًغلط ہے اس لئے جب کبھی بھی احتجاج کیلئے نکلنا پڑے تو منظم ہو کر نکلو اور خود پر کنٹرول رکھا کروکیونکہ تمہارے دشمن تمہیں ذلیل کروائیں گے۔

انہوں نے ان خیالات کا اظہار”عظمت قرآن کانفرنس“ سے خطاب کرتے ہوئے کیا، یہ ایمان پرور کانفرنس ممتاز سماجی شخصیت حاجی محمد یعقوب سلطانی مرحوم کی چھٹی برسی کے موقعہ پر حافظ ٹینٹ سروس واقع 39چونگی منعقد ہوئی، مرحوم خلدمکانی شہر کے معروف تاجروں علیم یعقوب سلطانی، وسیم سلطانی، عظیم سلطانی کے والد بزرگوارتھے،

خواتین کیلئے پردے کا الگ انتظام کیا گیاتھا، اس موقع پرشہنشاہ نقابت افتخار احمد رضوی نے نقابت کے فرائض انجام دیئے،قاری جواد خضر اعوان نے تلاوت کلام پاک اور ”کیو ٹی وی اے آر وائی“ کے عالمی شہرت یافتہ نعت خواں حضرات احمد علی حاکم، قاری شاہد محمود قادری اور صدارتی ایوارڈ یافتہ سیّد زبیب مسعود شاہ، بحضور سرورکونین ﷺ نعتیہ کلام کا نذرانہء عقیدت پیش کیاجبکہ خطیب مسجدِ حسن دربارحضرت سلطان باہو ؒ علامہ رفاقت علی قادری نے خطبہء استقبالیہ پیش کیا،

عظمت قرآن کانفرنس میں بذریعہ قرعہ اندازی عمرہ کے ٹکٹ کیلئے خوش نصیب عبدالرّحمن ولد محمد یونس سکنہ 105 سیون آر تحصیل چیچہ وطنی کا نام، موٹر سائیکل کیلئے محمد اسرار ولد محمد کریم کمالیہ کا نام اور جہیز کیلئے بچی مسماۃ شبانہ کا نام نکلا، ”عظمت قرآن کانفرنس“ میں ڈی ایس پی موٹر وے وحیدالقمر، سابق صدر انجمن صحافیاں محمد عدیل چوہدری، عطا میڈیا کے چیف ایگزیکٹو عطا مصطفیٰ،میڈیا ایڈوائزر منشا محسن، ملک طلال حسنات سلطانی بنک مینیجر اور عاطف حمید سلطانی، ملک ارشد سمیت اہم سیاسی وسماجی شخصیات اور مریدین و معتقدین کی کثیر تعداد نے شرکت کی، علاوہ ازیں متعدد نئے مریدین نے پیر سلطان فیاض الحسن سروری قادری کے دست مبارک پر بیعت کا شرف حاصل کیا، ملکی استحکام وسالمیت کیلئے دعا اور صحافی برادری سے اظہار تشکر کے ساتھ کانفرنس بخیروخوبی اختتام پذیر ہو گئی۔